Հայաստանը մեղադրում է Թուրքիային օդային ճանապարհը միտումնավոր փակելու համար

Հայաստանի իշխանությունները Թուրքիային մեղադրում են իր օդային տարածքով դեպի Հայաստան մարդասիրական օգնության տեղափոխումը արգելելու համար։ Քաղաքացիական ավիացիայի վարչության պետ Տաթևիկ Ռևազյանը «Ազատությանը» հայտնեց, որ չեղարկվել է «Քաթար էյրվեյզ» ավիաընկերության դեպի Հայաստան շուրջ 100 տոննա հումանիտար բեռ տեղափոխող Լոս Անջելես-Երևան չվերթը, ինչի առնչությամբ ավիաընկերոությունը որևէ հիմնավոր պատճառ չի ներկայացրել։ Պաշտոնյան ասում է՝ իրենք հիմքեր ունեն պնդելու, որ Թուրքիան միտումնավոր է փակել օդային ճանապարհը։

«Ոչ մի օֆիցիալ հիմնավորում տեղի չի ունեցել, բայց մենք տեղյակ ենք, և նույնիսկ ավիաընկերությունն էլ է հաստատել, որ խնդիրը եղել է Թուրքիայի օդային տարածքը, թույլտվություն չի տրամադրել Թուրքիան` հումանիտար բեռը տեղափոխել Հայաստան, բայց ավիաընկերությունն այդ իրավիճակում էլ իրականում հնարավորություն ուներ այլ ուղղությունով էլ թռիչքն իրականացնել, բայց որոշում է կայացրել չվերթը չեղարկել: Ինքը կարող էր բեռը բերել Ռուսաստանի և Վրաստանի օդային տարածքով, դա լուրջ խոչընդոտ իր համար չէր ստեղծի մանավանդ կարևոր է նշել, որ իրենք արդեն խոսք էին տվել, որ չվերթը կիրականացվի, փոխանցումն արվել էր, ամեն ինչ հաստատված էր, և վերջին վայրկյանին են այս որոշումը կայացրել: Այսինքն` եթե նախապես իմանային դրա մասին, այլ ընկերությունով կարող էին կազմակերպել չվերթը», — ասաց Ռևազյանը:

Պաշտոնական Անկարան դեռևս չի արձագանքել Հայաստանից հնչող այս մեղադրանքին:

Քաղավիցիայի վարչության պետի խոսքով՝ սա առաձին անգամը չէ, որ Թուրքիան խոչընդոտում է բեռների տեղափոխումը Հայաստան. — «Մեզ զեկուցել են, որ օրինակ` Թուրքիան պահանջում է, որ ամբողջ ապրանքի ցանկը ավիաընկերությունը տրամադրի, որ ինքը հաստատի իր օդային տարածքով անցնելը, և դա ընդունված չէ: Այսինքն` ինքն իրավունք ունի, որովհետև ինքն է կառավարում իր օդային տարածքը, բայց ընդհանրապես ավիացիայում ընդունված չէ ամբողջ ապրանքի ցանկը պահանջել ավիաընկերությունից: Եթե վտանգավոր բեռ կա օդանավի մեջ, դա կարող են իրենք պահանջել զուտ, որովհետև եթե դեպք պատահի ճանապարհին, և պետք է վայրէջք կատարի ավիաընկերությունը, որ պատրաստված լինեն որևէ դեպքին, բայց որ ընդհանրապես ամբողջ ցանկը պահանջեն, այդպիսի բան իրականում չի լինում»:

Ռևազյանն ասում է` այս բեռը ստուգումների փուլն արդեն իսկ անցել էր, վերջնական հաստատումը ստացել, սակայն վերջին վայրկյաններին չվերթը չեղարկվել է: Ամերիկահայ համայնքի կողմից ուղարկվող 100 տոննա հումանիտար բեռում և մեծաքանակ դեղորայք է, և բժշկական սարքավորումներ, քնապարկեր, հագուստ և այլ անհրաժեշտ պարագաներ:

Добавить комментарий

Ваш адрес email не будет опубликован. Обязательные поля помечены *