«Սա պատերազմ էլ չէ՝ ահաբեկչություն է». Մարտունու բնակիչները Reuters-ին պատմել են ռմբահարումների մասին

Մարտունու բնակիչները Reuters լրատվական գործակալության թղթակիցներին սարսափելի տեղեկություններ են պատմում ադրբեջանական զինուժի կողմից բնակավայրի ռմբահարումների մասին:

Մարտունին արդեն տևական ժամանակ է ադրբեջանցիների թիրախը:

«Ճաշում էինք, բեկորն այստեղ եկավ, գնդակն էլ պատը խոցեց, Աստված փրկեց մեզ: Չգիտեմ, թե սա ինչ էր, պայթյունը շատ հզոր էր: Հետո ևս մի քանի պայթյուն որոտաց», — ասել է Ռազմիկ Բաղիրյանը:

Մարտունու բնակիչներից Գարիկն էլ պատմել է, որ ամբողջովին ավերված տան փլատակները էքսկավատորով են մաքրել:

Reuters-ի նկարահանող թիմի անդամներն ասում են, որ ռմբահարման ականատեսն են եղել:

Մյուս թիմն էլ ադրբեջանական տարածքից՝ Թարթառի շրջանից է հայտնում, որ այդ ավանի կենտրոնը հարվածի է ենթարկվել:

Օրեր առաջ Ռուսաստանի միջնորդությամբ համաձայնեցված հրադադարը գործնականում ուժի մեջ չէ:

«Ադրբեջանցիներն են, չգիտեմ՝ դա ավիացիոն ռումբ էր, կասետային էր, չգիտեմ, թե դա ինչ էր, բայց շատ ուժեղ էր պայթյունը, էքսկավատորով են ծերունու մարմինը դուրս հանել», — ասել է Գարիկը:

Իսկ Մարիանան հավատում է, որ Ռուսաստանի նախագահ Վլադիմիր Պուտինը ի զորու է դադարեցնել պատերազմը: Նա ասում է, որ եթե այսպես շարունակվի, կսկսվի մահմեդականների և քրիստոնյաների պատերազմ:

«Մենք երազում ենք, որ մեր երեխաներն ու թոռները խաղաղության մեջ ապրեն, խաղաղություն լինի, այլ ոչ թե այսպես: Սա արդեն երրորդ պատերազմն է, շատ վախենալու է, թեպետ սա պատերազմ էլ չէ՝ ահաբեկչություն է: Երանի սա ավարտվի», — նշել է Մարիանան:

Մարտունու և ամբողջ Արցախի հայության երազանքն է, որ այս արյունալի պատերազմը վերջապես ավարտվի:

Добавить комментарий

Ваш адрес email не будет опубликован. Обязательные поля помечены *